ഒരു ചിരി ഞാന്‍ കരുതിവെക്കാം
നീ വരുമ്പോള്‍ എന്‍ മനം മൂടാന്‍.
മാനം മൂടിയ മേഘക്കീറില്‍ മഴ
ഒളിച്ചിരിക്കുംപോല്‍, ഉഷ്ണ-
ക്കാറ്റില്‍ നീരാവിക്കണം പോല്‍;
പെയ്യാത്ത മഴയുടെ കുളിര്‍
സിരകളില്‍ ഉഷ്ണമാറ്റുമ്പോള്‍,
മുളയ്ക്കാന്‍ വിറപൂണ്ട വിത്ത്‌
മണ്ണില്‍ മുഖം പൂഴ്ത്തുംപോല്‍,
വഴിമറന്നൊരു വസന്തമായ്‌..
വെറുതെ നിനച്ചിരിപ്പൂ;
ഇരുണ്ട വഴിയുടെ അങ്ങേ-
ത്തലയ്ക്കല്‍ ഒരു തിരിനാളമായ്‌
നീ തെളിയുന്നതും തിളങ്ങുന്ന
നിന്മിഴിദീപങ്ങള്‍ നക്ഷത്ര വെട്ടം
പരത്തുന്നതും കാത്ത് ഞാന്‍ ഇങ്ങ്
ഈ ചുമടുതാങ്ങിച്ചോട്ടില്‍
താന്തനായ്‌,പഥേയമില്ലാപ്പഥികനായ്‌....
No comments:
Post a Comment