പ്രണയത്തിന് നിറം ചുവപ്പാണോ?!
ആയിരിക്കാം.....;
ചുവപ്പ് മഞ്ഞയായും
നീലയായും മാറാനും തരമുണ്ട്
ചാറ്റിങ് ജാലകത്തിലെ
ചിഹ്നങ്ങളില്‍ ഉരുവാകുന്ന
പ്രണയങ്ങള്‍...
എട്ടു കാലി വലകളില്‍ കുരുങ്ങി
അമര്‍ന്നൊടുങ്ങുന്നൂ.
മിസ്സ്ഡ്‌ കാളായി തുടങ്ങി
കുറും സന്ദേശങ്ങളില്‍ കൂടി
വളര്‍ന്നു പടര്‍ന്ന് ചിലവ-
ലോഡ്ജു മുറിയിലേക്ക്..!!!
പ്രണയം ചിറക് വിടര്‍ത്തുന്നു
മൊബൈലില്‍ നിന്നും
വലക്കണ്ണികളിലേക്കും;
തിരികെ മൊബൈലിലേക്കും!
തീവണ്ടി ആപ്പീസില്‍
വഴിക്കണ്ണ്‍ നട്ട്...
ചില പ്രണയിനികള്‍;
സമാന്തരങ്ങള്‍ പോലെ
ചില കുടുംബ വഴികള്‍
പ്രണയചിന്തകള്‍
നെരിപ്പോട് പോലെ;
കനലാട്ടങ്ങളില്‍
കാഴ്ച്ചകള്‍ ജ്വലിക്കുന്നു
പ്രണയത്തിന്‍റെ
ഉയിര്‍തൊട്ട,
ജീവിതത്തിന്‍റെ
നറുംതേന്‍ നുകര്‍ന്ന,
ഒരു പ്രണയിനിയുടെ
മനസ്സ് മന്ത്രിക്കുന്നു
ഹൃദയചിഹ്നത്തില്‍
തുള തീര്‍ക്കുന്ന അമ്പ്
പ്രണയം മരിക്കും വരെ
തറഞ്ഞു കയറട്ടെ...!!!
No comments:
Post a Comment